क्याप्टेन विजय लामालाई यूएईबाट अनुरोधपत्र

केहि दिन अगाडि क्याप्टेन विजय लामालाई यूएईमा काम गर्ने एक जना नेपालीले कति पर्छ एउटा प्लेनको हामी किनिदिन्छौ भन्नुभएछ ।

विजय लामा ज्यू,

यो कामको समन्वय हजुरले गरिदिनुहोस हामी जुटाउछौ प्लेन किन्ने पैसा र सम्बन्धित निकायसंग कुरा गरेर कत्ति पर्छ एउटा वाइड बडी प्लेनको सो रकम उल्लेख गरेर नेपाल एयरलाइन्सको नाममा छुट्टै बैंक खाता खोली दिनुहोस । अनि यूएईमा काम गर्ने हामी नेपाली उक्त खातामा ५० डलरदेखि माथि कति सकिन्छ जम्मा गर्नेछौ । अनि हामीले बैंकमा जम्मा गरेको रसिद अनुसारको रकमको शेयर प्रमाणपत्र जारि हुने नियम बनाउन लगाउनुहोस । बिना झन्जट चाहिए जति रकम जम्मा हुनेछ र मलाइ लाग्छ दस हजार डलरसम्म जम्मा गर्ने नेपालीहरु निस्किने छन् । एक हजार डलर बराबर लगभग एकलाख नेपाली रुपैयाँ हुन्छ । सके हाम्रो लगानीले हामीलाई पनि फाइदा दिन्छ, यदी हामीलाई फाइदा भएन भने पनि देशलाई त पक्कै फाइदा हुन्छ । यसरि प्लेन किन्दा कसैलाई साँवा पनि तिर्नुपर्दैन र ब्याज पनि तिर्नुपर्दैन । खर्च कटाएर बचेको नाफा अनुसार शेयरको भाउ बढाई दिए पुग्छ । शेयर दातालाई कति प्रतिशत फाइदा दिने अनि नेपाल एयरलाइन्सले कति प्रतिशत फाइदा लिने भन्ने कुरा बिज्ञको सुझाबका आधारमा तय गर्दा हुन्छ र मलाइ लाग्छ ६–७ बर्षमा लगानी उठ्ने छ ।

अहिले यूएईमा रहेका हाम्रा करिब ५ लाख नेपालीहरु बोकेर बिदेशी एयरलाइन्सले बर्सेनी अरबौ कमाइरहेका छन । यदि गतिलो नेपाली प्लेन हुने हो भने हामी नेपाली प्लेन नै चढ्ने थियौ । तर, नयाँ प्लेन किन्दा भने अडर गरेको तीन चार बर्षपछि मात्र पाइन्छ । धेरै प्लेन भएर चलाउन नसकेर घाटामा गएका कयौ एयरलाइन्सहरु छन् । तिनीहरुसंग बेच्न मिल्ने थुप्रै नयाँ प्लेनहरु होलान, त्यसै मध्येबाट एउटा प्लेन छानेर किन्दा हुन्छ । नेपाल एयरलाइन्सको लोगो राखेर पछि पेन्ट गराउदा पनि हुन्छ । तर कमिशन र भस्ट्राचार नहोस, कारोबार पारदर्शी र विश्वासिलो होस् । प्लेन किन्ने प्रक्रिया हुँदै गर्दा ३ महिना जतिमा त रकम पनि जम्मा भइसक्छ । यो तरिकाले प्लेन किन्न शत प्रतिशत सम्भब छ । साउदी, कतार र मलेसिया बस्ने नेपालीहरुले पनि यसै गरेर प्लेन किनेर आफूले प्रयोग गर्न पाहुने गरि चलाउने बाताबरण बन्नेछ । हामीलाई आशा छ क्याप्टेन विजय लामाले यो कामको नेतृत्व लिनुहुनेछ ।